MARTAPURA (TABIRkota) – Alhamdulillah, tahun ini hingkat pulang kita mahaul aruah KH Muhammad Zaini Abdul Ghani atawa Abah Guru Sekumpul, imbah dua tahun parai marga Covid 19.
Ujar KH Wildan Salman atau Guru Wildan, haul Abah Guru nang ka-18 ini, insya Allah acaranya pas arian Kamis malam Jumahat (26/1) nang dudi.
“Acaranya di rumah Gubernur Kalimantan Selatan (Kalsel), Sahbirin Noor atau Paman Birin di Jalan Kertak Baru Kampung Keramat RT 1, Kecamatan Martapura Timur, Kabupaten Banjar,” ujar sidin mamadahakan wan bubuhan wartawan arian Ahad malam Sanayan (8/1) nang tadi pas rahatan di rumah Paman Birin.
Haul tahun ini, jar sidin pulang, sa-Banuaan disaruani.
“Kita ada jua maundang jamaah matan luar Banua, bubuhan Pesantren Tebu Ireng Jombang,” ujar sidin.
Alhamdulillah, bubuhan pimpinan wan santri Pesantren Tebu Ireng siap haja saruan.
Di acara haul tu kaina, nang bacaramah ahli tafsir dari Tebu Ireng, KH Ahmad Mustain Syafii.
“Insya Allah, haul tahun ini acaranya baganalan. Habarnya, tamu matan luar negri gin pacang saruanan jua,” ujar Guru Wildan.
Habarnya, tahun ini bubuhan Kalimantan Tengah (Kalteng) wan Kalimantan Timur (Kaltim) bahaulan jua.
Maginnya ai bubuhan kita di Hulu Sungai, asing-asingnya mahaul Abah Guru Sekumpul. (ra/zda)
Kamus:
- Hingkat (Banjar Pahuluan); kawa = Bisa.
- Parai = Libur.
- Nang dudi = Yang akan datang.
- Banua; sa-Banuaan = Wilayah Kalsel; seluruh masyarakat Kalsel.
- Matan = dari.
- Saruan; basaruan; disaruani; manyaruani = Kondangan; mengundang; diundang; mengundang.
- Ganal; baganalan = Besar/akbar; besar-besaran.
- Pacang;pacangan/cagar;cagaran = akan.
- Maginnya = Apalagi
- Asing-asingnya = Masing-masing.
