BANJARMASIN (TABIRKota) – Harau nah, PPKM alias Pemberlakuan Pembatasan Kegiatan Masyarakat livil 1 gasan ma’atasi covid 19 di Banua kita Kalimantan Salatan (Kalsel), ditarusakan pulang Wal ai, hampai 5 September kaina.
Wayah arian Kamis (4/8) sumalam, Kapala Dinas Kasihatan (Dinkes) Kuta Banjarmasin, Dr Diauddin mamadahakan, PPKM livil 1 di samunyaan kabupatin/kota di Banua, bamusti hudah matan 2 Agustus arian samalam.
“Kaputusan ngini sasuai wan papadah Mantri Dalam Nagri (Mendagri) RI No 39 tahun 2022 parkara PPKM,” ujar sidin.
Papadah Mantri jua ujar sidin, manyuruh maada’akan pulang posko covid di kampung wan kalurahan, gasan ma’atasi covid 19 di Sumatra, Nusa Tenggara, Kalimantan Sulawesi, Maluku wan Papua.
“Papadah Mantri tu kada kawa dianggap inting, wal ai, musti kita hatiakan banar, sababnya covid 19 wayah kadamiya pina babanyak pulang,” ujar sidin pulang mamadahakan.
Sabujurannya, paksin (vaksin, red) pas rahatan PPKM livil 1 ngini tatap diutama akan banar dusis katiga atawa booster.
Kahandak tu, di Banua ni vaksin katiga kawa digawi gasan tiga juta nusia, sasuai wan nang sudah di vaksin dusis panambayan.
Tapi pang, sampai kadamiya 22 parsin wastu nang hudah bapaksin booster. Han, dimapa am.
Jadi ujar Dr Diauddin pulang, wayah covid 19 nang pina sasain babanyak naya, sambil ai baingat.
“Lamunnya balum bapaksin, baiknya hancapi bapaksin. Tabaik mancagah pada maubati, sanak ai,” ujar sidin.
Lamunnya kita malihati data Dinkes hampai arian Arba (3/8) samalam, covid 19 di Banua batambah 111 ikung nusia pulang nang takana.
Satumbangan wabah panyakit covid 19 ni, di Banua kita ada 85.910 kasus.
Nang Alhamdulillah kawa wagas, hitungannya 82.910 ikung nusia, nang matian hitungannya 2.550 urang nusia. (ra/zda)
Kamus:
- Harau = Waduh (ungkapan/suatu keadaan yang membuat terkejut)
- Wayah = Saat; ketika
- Samunyaan = Seluruh; semua
- Bamusti = Dipastikan; ditetapkan
- Parkara = Tentang
- Inting = Enteng; ringan; gampang; mudah
- Kadamiya (dialek Banjar Pahuluan/Batang Alai/Barabai) = (saat) Sekarang
- Rahatan = Keadaan sedang berlangsung
- Ngini; naya (dialek Banjar Pahuluan) = ini
- Nusia = Manusia; orang
- Panambayan = Yang pertama
- Wastu (dialek Banjar Pahuluan) = Hanya
- Dimapa (dialek Banjar Pahuluan); Kadimapa (Banjar Alai/Batang Alai/Barabai); kaya apa (Banjar Kuala) = Bagaimana
- Sasain = Semakin
- Satumbangan = Selama; sepanjang
- Wagas; wigas = Sembuh
