BANJARMASIN (TABIRKota) – Bubuhan Pamarintah Kuta (Pemko) Banjarmasin, Kalimantan Salatan (Kalsel) bamula mamilihi wan mancatati gadung-gadung tuha gasan mamastiakan aman atawa kada mun diganai.
Kapala Dinas Pakarjaan umum wan Panataan Ruang (PUPR) Kuta Banjarmasin, Suri Sudarmadiyah, sanak ai, sidin mangaku hudah maulah tim gasan mancatati kaya apa tagasnya gadung-gadung nang ada di Banu ani.
“Wabilhususnya, nang kalihatan mata hudah pina singgang,” ujar sidin rahatan arian Arba (3/8) samalam.
Mun manurut sidin, pinanya banyak gadung-gadung nang lamunnya ditiring, pina mambari takutan wan mambari marma kalihatan banar pina singgang.
“Makanya am, parlu pang kita pariksai nang kaya apa, aman haja kah lamunnya diganai,” ujar sidin pulang.
Lamunnya nyata dah kalihatan gadung pina singgang, mau kada mau nang ampun dibawai bapandiran hulu, kaya apa lamun di dganai, kada papa kah.
Tapi kada sahibar bapandiran haja pang, lamunnya kawa tu, dimapa jua sakira gadung nang tu ti kada bahayaan lagi lamunnya diganai.
Mamariksai, mamilihi wan mancatati gadung-gadung nang pina singgang tu ti kada gagampangan sanak ai.
Makanya am, bubuhan Dinas PUPR Banjarmasin pacangan mambawai “tim independen” gasan mambantui mangira-ngira kaya apa tagasnya gadung atawa rumah, sakira kawa diulahakan “sertifikat layak fungsi” ujar urang wayahini manyambatnya.
Suri Sudarmadiyah mamadahakan pulang, ujar sidin, ni tamasuk hahanyaran di Banua, baluman di gawi banar, masih dihabar-habarakan ka sana ka mari hulu.
“Kita baharap banar, warga di Banua mandukung napa nang pacang kita gawi ni supaya kainanya kadada lagi gadung atawa bangunan nang rabah, rubuh atawa runtuh tajalapak sampai bamatian urang nang bagana di dalamnya,” ujar sidin.
Bujur jua pang ujar sidin tu, pa kada sakali dua di Banua ni gadung atawa bangunan pun jua rumah, nang rubuh bakajutan. Ada nang tapajal ka dalam tanah.
Inya pang tanah di Banua kita ngini, tamasuk tanah nang lamah nang kaya tanah pahumaan.
Lamunnya batajak rumah apalagi gadung, carucuknya musti bujur-bujur nahap.
Apalagi sanak ai, lamunnya gadung tu hudah baumur puluhan tahun, pa bisa haja jua japukan. Piasat am kita barataan mun sampai rubuh atawa tajalapak bakakajutan. (ra/zda)
Kamus:
- Bamula = Mulai
- Gadung = Gedung (serapan dari bahasa Indonesia)
- Singgang = Miring
- Gana; diganai = Diam; ditinggali
- Tiring; ditiring = Lihat; dilihat (dengan seksama)
- Marma = Ngeri
- Bahayaan = Was-was
- Hanyar; hahanyaran = Baru; baru-baru saja/terbaru
- Pacang = Akan
- Tajalapak = Kondisi terjatuh hingga terduduk, pada konteks bangunan, tajalapak digunakan untuk menggambarkan bangunan yang runtuh hingga rata dengan tanah.
- Bakajutan = Dengan tiba-tiba
- Tapajal = Terbenam
- Tajak; batajak = Bangun; membangun
- Carucuk = Pondasi
- Nahap = Kuat/kokoh
- Japuk; japukan = Lapuk; banyak yang lapuk
- Piasat = Kemalangan
