BANJARMASIN (TABIRkota) – Alhamdulillah banar sanak ai, Banua kita bapakulih bantuan 43.000 dusis paksin matan Pamarintah Pusat gasan manangkal Panyakit Muntung wan Kuku (PMK) nang manyarang inguan nang bakuku balah, samisal sapi, kambing wan biri-biri.
Ujar Kapala Dinas Parkabunan wan Patarnakan Provinsi Kalimantan Salatan (Kalsel), Suparmi, 43.000 dusis paksin kulihan matan Kementrian Pertanian RI nangitu, gasan program paksinasi inguan tarnak tahap kadua.
“Prugram tahap pamulaan hudah kita gawi arian Juni samalam pas dibari bantuan 4.300 dusis paksin matan Pamarintah Pusat,” ujar sidin di Banjarmasin, arian Jumahat (22/7) samalam.
Jadi ujar sidin pulang, sasuai papadah Gubernur Kalsel, 43.000 dusis paksin nintu langsung haja dibagiakan ka kabupatin/kuta di Banua.
“Pambagiannya kada sama, sanak ai, manyasuaiakan wan kaadaan di kabupatin/kuta nang basangkutan,” ujar sidin.
Jadi hitungannya tu lah, gasan Kuta Banjarmasin 100 dusis paksin haja.
Sababnya, di Banjarmasin tu ti kabanyakan kalaluan urang maangkut haja, kada banyak urang nang bagaduhan sapi, kambing atawa biri-biri.
Imbahitu Banjarbau, dibari’i 1.000 dusis, tabanyak pada Banjarmasin. Inya sasuai haja jua di Banjarbaru tabanyak urang nang bagaduhan.
Kabupatin Banjar labih banyak lagi, dibari’i 6.000 dusis wan Batula 1.500 dusis.
Mun bubuhan hulu sungai, nang kaya Tapin dibari’i 4.000 dusis, Hulu Sungai Salatan (HSS) 2.000 dusis, Hulu Sungai Tangah (HST) 3.000 dusis, Hulu Sungai Utara (HSU) 1.000 dusis, Balangan 1.000 dusis wan Tabalung 1.500 dusis.
Lamunnya bubuhan pasisir, lain pulang pambagiannya. Tanah Bumbu dibari’i 6.000 dusis, Kutabaru 2.500 dusis wan Tanah Laut nang paling banyak, dibari’i 13.400 dusis.
Jadi ujar Suparmi manambahakan pulang, paksinasi gasan manangkal PMK tu ti pacang digawi matan 25 Juli sampai 7 Agustus bulan dudi.
“Sabujurannya, Banua kita ni hitungannya sudah kawa manangani PMK, sababnya imbah dahulu sawat ada manyarang di ampat kabupatin, imbah tu kadada lagi,” ujar sidin.
Wayahitu, sawat 530 ikung inguan di ampat kabupatin nang kana PMK tapi imbah tu, kadada batambah lagi. (ra/zda)
Kamus :
- Banua = sebutan untuk wilayah Kalimantan Selatan
- Pakulih; bapakulih = Dapat, mendapat/memperoleh
- Matan = dari
- Ingu; inguan/gaduhan/bagaduhan = Pelihara; peliharaan/memelihara
- Pamulaan = yang pertama
- Hudah = sudah
- Papadah = arahan
- Lalu; kalaluan = Lewat; hanya lewat
- Lamun = kalau
- Pacang = akan
- Dudi = nanti/yang akan datang
- Imbah = setelah
- Wayahitu = waktu itu/saat itu/ketika itu
