Rami Bangat wal ai, 128 Jukung Cis Balalajuan di Sungai Marabahan

“Nang mantap lagi sanak ai, doorprize-nya kada nang kaya lumba-lumba singrajin barang-barang iliktrunik, tapi pakakas kalutuk nang kaya ruda parahu, as parahu, kabulatur wan pakakas lainnya”

Silahkan Bagikan / Share :

Bupati Batola, Hj Noormiliyani maangkat bandira tanda bamula balalajuan jukung cis (gambar: TABIRkota/antara kalsel)

MARABAHAN (TABIRkota) – Harau nah, rami bangat wal ai arian Sabtu (29/1) wan Ahad (30/1) samalam, 128 jukung cis balalajuan di sungai Marabahan, Kabupatin Barito Kuala (Batola), Kalimantan Selatan (Kalsel) pas di siring Kodim 1005/Batola.

Acara Balalajuan Jukung Cis nang diada’akan Pamarintah Kabupatin (Pemkab) Batola tu ti, dibuka Bupati, Hj Noormiliyani AS pas acara Hari Jadi Batola nang ka-62.

Matan rami bangat acaranya, banyak warga nang katuju malihat wan umpatan jua basurak manyumangati bubuhan supir jukung cis nang balalajuan.

Nang umapatan balalajuan kada sahibar bubuhan Marabahan haja, banyak ai jua bubuhan warga lain, wabil husus nang badiam di batang banyu, umpat mangirim parwakilan supir-supir jukung cis nang lihai-lihai.

Matan 2 Januari, pandaftaran hudah dibuka ulih panitia. Limbahitu, arian Jumahat (28/1) nang hintadi partamuan tiknisnya.

Pas arian balalajuan, bubuhan puhun basaing lawan bubuhan wakil matan Tapin.

Bubuhan Marabahan manurunakan 64 jukung cis. Kada kalah tadah, bubuhan Tapin mangirim 48 jukung cis, bubuhan supir cis nang harat matan Kacamatan Candi Laras Utara (CLU).

Bubuhan Marabahan nang diturunakan kabanyakan matan Kacamatan Bakumpai nang sarajin manang tarus mun balalajuan kalutuk di Banua Anyar.

Nang umpat balalajuan tu ti, kada inya bubuhan supir nang lihai-lihai haja, ada jua bubuhan supir cis pamula matan Kacamatan Alalak.

“Lamunnya gasan balalajuan jukung cis, buhan kami ni hanyar pamula, balum bapangalaman. Tapi lamunnya lumba Parahu Naga, lain kisah am, wani disaung kita,” ujar Junaidi, sidin matan Alalak nang mambawa 10 supir jukung cis.

Lamunnya sahibar balalajuan di kampung, ujar sidin, rancak haja sabab banua sidin andakannya di batang banyu, rahat haja bakalutukan.

“Tapi sanak ai, bujur haja baluman professional kah jar urang tu, tatap kami basiap bujur-bujur maksimal. Bubuhan supir jukung cis gin Latihan jua supaya awak kuat,” ujar sidin pulang.

Maka kada supirnya jaja nang disiapakan, jukungnya mintu jua, dimapa anggaran kada miris wan masinnya musti mantap.

Rahatan baisukan, jam 09.00 Wita Balalajuan Jukung Cis bamula start di siring Kodim 1005/Batola hampai ka siring Ulek Marabahan, kikira tangah dua pal atawa sapal satangah (1.500 meter) jauhnya.

Hadiahnya wal ai, Rp29 juta. Jukung cis nang palajunya dibari Rp7 juta, nang numur dua palajunya dapat Rp6 juta wan nang numur tiga palajunya dibari Rp5 juta.

Lumba nang digawi Dinas Kepemudaan Olahraga Budaya dan  Parawisata (Disporbudpar) Batola ngini ada jua manyadiakan hadiah duit gasan nang manang numur anam, tamasuk supir wan jukung cis nang pambagusnya.

Nang mantap lagi sanak ai, doorprize-nya kada nang kaya lumba-lumba singrajin barang-barang iliktrunik, tapi pakakas kalutuk nang kaya ruda parahu, as parahu, kabulatur wan pakakas lainnya.

Napa syaratnya umpatan lumba balalajuan jukung cis ngini? Sutil haja sanak ai, jukung cis nang dipakai musti jukung ulin wan supirnya musti mamakai palampung atawa life jacket. (zda/ant)

Kamus :

  • Jukung cis = perahu kecil bermesin
  • Balalajuan = lomba
  • Sahibar = sekedar
  • Batang banyu = bantaran sungai
  • Nang hintadi = baru-baru tadi
  • Puhun; bubuhan puhun = istilah merujuk kepada tuan rumah; tuan rumah
  • Matan = dari
  • Kada kalah tadah (istilah) = tidak mau kalah
  • Sarajin = biasanya
  • Kalutuk = perahu besar bermesin
  • Gasan/sagan = untuk;  buat; kepada
  • Saung; disaung = adu; diadu
  • Rahat = sering
  • Mintu = seperti itu
  • Dimapa (Banjar Hulu Sungai/Pahuluan) = bagaimana
  • Anggaran = supaya
  • Rahatan = Ketika; saat
  • Hampai = sampai
  • Kikira = sekitar; kira-kira
  • Tangah dua pal / sapal satangah (hitungan jarak) = 1.500 meter
  • Sutil = mudah
Silahkan Bagikan / Share :

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

ULM to Visit PPSDM Migas, Connecting Theory to Practice

Rab Feb 2 , 2022
"Indonesia's 3rd oldest refinery is also situated in the PPSDM Migas area"

You May Like