BALANGAN (TABIRkota) – Mantap wal ai, wayahini di Kabupatin Balangan, Kalimantan Selatan (Kalsel) hudah baisian kantur Imigrasi saurang, kada ngalih lagi bubuhan kita di Pahuluan mun handak baulah paspur (paspor, red).
Ujar Bupati Balangan, H Abdul Hadi mamadahakan, palayanan kaimigrasian bamula pas ada parjanjian tatulis atawa jar urang wayahini manyambatnya MoU, Memorandum of Understanding alias nota kesepahaman matan Pemkab Balangan lawan Kantur Wilayah Kementrian Hukum dan HAM (Kemenkumham) Kalsel.
“Parjanjian tatulis ngintu pas bulan Mai samalam. Ulun ni handaknya Banua kita banyak didatangi urang, kada sahibar handak bausaha atawa bapiknikan samata,” ujar sidin.
Salian jua, ujar sidin pulang, pamarintah Balangan pacang malakuakan panggabungan atawa istilah wayahini disambat regrouping wan parampingan Satuan Kerja Perangkat Daerah (SKPD).
“Jadi pacang ada labihan gadung kantur wan fasilitas nang lain jua,” ujar sidin.
Pas ai arian nintu, jar sidin pulang manyambung kisah, sidin tawari bubuhan Kemenkumham Kalsel mambuka layanan kaimigrasian di Balangan wan jua manawari fasilitas gadung kantur nang andakannya sasuai.
Tapi inya kada sahibar supaya urang datang ka banua saurang pang jadi diada’akan kantur imigrasi tu tih, nang iyanya tu mamarakakan palayanan gasan warga Balangan sabarataan.
Himung ai Kapala Kanwil Kemenkumham Kalsel, Tejo Harwanto limbahnya Balangan baisian kantur imigrasi saurang tadi, lalu sidin batarimakasih banar wan pamarintah Balangan nang mandukung banar gasan mambaiki palayanan kaimigrasian di Kalsel, wabilhusus di Balangan.
“Jadi parjanjian tatulis nang kita ulah, itu manunjukakan kumitmin (komitmen, red) nang kuat matan pamarintah Balangan wan Kanwil Kemenkumham Kalsel, wabilhusus Kantur Imigrasi Kalas I Banjarmasin gasan palayanan maurus paspur,” ujar sidin.
Jadi wayahini nyaman dah, bubuhan kita di Pahuluan mun handak baulah paspur, datang haja ka Balangan, kanturnya sudah rasmi dibuka, jadwalnya saban bulan minggu nang pamulaan pas ari Sanayan wan Salasa, andakan kanturnya di bakas kantur Dinas Koperasi, UKM dan Perindustrian Balangan. (zda/RA)
Kamus :
- Saurang ; saurangan = Sendiri ; sendirian
- Bubuhan = Kelompok ; kekerabatan
- Pahuluan = Daerah atau kawasan hulu
- Bamula = Bermula ; awalnya
- Sahibar = Sekedar
- Samata = Saja ; semata-mata ; hanya
- Salian jua = Dan juga
- Arian = Hari ; saat ; ketika
- Sasuai = Pas ; tepat
- Banua = Kampung ; wilayah tempat tinggal
- Wabilhusus = Khususnya
