BANJARMASIN (TABIRkota) – Di Banjar (Kota Banjarmasin, red) tu sanak ai, ada talu buting batang banyu nang ngalih mun handak dibujuri, napa pang ujar habar matan Dinas Pekerjaan Umum dan Penataan Ruang (PUPR) Kuta Banjarmasin, Kalimantan Selatan, parumahan liwar padat di batang banyu tu ti, kabanyakan urang nang batajak kaganaan.
Batang banyu nang talu tu ti, ujar Kabid Sungai Dinas PUPR Kuta Banjarmasin, Huzbulwathani, batang Guring, batang Kalayan lawan batang Pakapuran.
“Sabujurannya, katalu batang ngintu panting banar dibujuri wan dibarasihi, sabab kagunaannya bakaliwar panting atawa ujar urang wayahini manyambatnya, sangat vital, ujah,” ujar sidin mamadahakan di Banjarmasin, wayah arian Sanayan sumalam.
Manurut sidin, katalu batang tu ti bakaliwar panting gasan kalancuran banyu batang-batang banyu halus ka batang banyu ganal nang kita manyambatnya batang Martapura.
“Nang kaya batang Pamurus, tu panahan nang di Beruntung Jaya wan saputaran Perona di Banjarmasin Selatan nang turunnya banyu ka batang Guring, hujung-hujungnya kaina turun pulang ka batang Kalayan wan Pakapuran,” ujar sidin.
Makanya katiga batang ngitu bakaliwar panting dibujuri sakira landas banyunya nurmal, sababnya katalunya tu basampukan haja.
Lamunnya hudah barasih wan landas banyu normal, ujar sidin, kawa manariki banyu matan batang nang lain sakira kada kajadian ba’ah “tangkujuh”.
“Kita ni handak banar mambujuri katiga batang tu tadi anggaran barasih wan landas banyunya nurmal. Masalahnya tu sabuting haja, sanak ai, parumahan bilang rapat banar urang batajak dipinggiran batang banyu ngintu,” ujar sidin pulang.
Lalu ujar sidin bakisah, 2019 nang lalu suah digawi manurmalakan batang Guring, matan ngalih banar pangarukannya napa pang kababanyakan nang batajak parumahan.
“Tapaksa kita ugah. Tapi pang, banyak buhan warga nang kada katuju. Ada jua kita gawi, tapi kaya itu ti pang, bahanu ada haja nang pina ma’ancam-ancam,” ujar sidin mangisahakan.
Pukuknya ujar sidin, pacangan lapah tu pang pamarintah kuta, musti bajuang bujur-bujur gasan mambujuri atawa manurmalakan batang-batang banyu nang talu huaran tu.
“Apalagi batang Kalayan wan batang Pakapuran, banyak bangunan nang musti dibibasakan. Lamunnya dipaksa’akan dikaruk kada dibibasakan, nang ditakutanakan tu kaina banyak rumah nang rumbih, labar am kapiasatan,” ujar sidin.
Tapi biar nang kaya apa haja, pamarintah kuta malalui Dinas PUPR tatap bausaha mambujuri atawa manurmalakan batang-batang banyu, nang kaya batang banyu di A Yani, batang banyu di Veteran wan batang banyu di Zafri ZamZam.
Tahun nangini haja pamarintah kuta maangarakan duit Rp8,7 Miliar gasan mangaruk wan manurmalakan batang banyu, tamasuk batang banyu nang talu huaran tu tadi. (zda/RA)
Sumber: Antarakalsel
Kamus :
- Talu ; Katalu ; Katalunya = Tiga (hitungan angka) ; ketiga (jumlah) ; ketiganya
- Buting ; Uting = Buah (hitungan jumlah. contoh satu buah, dua buah, dll)
- Banyak ; Kabanyakan ; Kababanyakan = Banyak ; Sangat banyak ; Banyak sekali
- Batajak = Membangun
- Kaganaan = Tempat tinggal; hunian ; rumah
- Batang Banyu ; Batang = Sungai
- Bujuri = Dibetulkan ; diperbaiki
- Liwar ; Bakaliwar = Sangat ; Teramat sangat
- Lancur ; Kalancuran = Alir ; mengalir ; aliran
- Landas = Lancar ; deras (aliran air)
- “tangkujuh” = istilah Banjar (banyu badiam kadada palariannya) yang berarti air diam tergenang
- Anggaran = Agar ; supaya
- Parumahan = Kawasan hunian / tempat tinggal
- Ugah = Pindah ; relokasi
- Bahanu = Kadang
- Pacangan = Bakalan ; akan
- Huaran = Macam ; jenis
- Rumbih = Longsor
- Piasat ; Kapiasatan = Celaka ; sial ; kena sial ; menjadi direpotkan (urusan/masalah)
