BANJARMASIN (TABIRkota) – Perusahaan Daerah Air Minum (PDAM) Bandarmasih, Kuta Banjarmasin, Kalimantan Selatan (Kalsel) hakun mambaikiakan mitiran banyu nang rusak bakas tarandam ba’ah.
Ujar Supervisor Pembacaan Meter dan Rekening, PDAM Bandarmasih, Ari Yudha Lesmana mamadahakan, nang dibaikiakan tu ti mitiran banyu nang rusak baik nang tarandam kana ba’ah banyu pasang atawa nang kaba’ahan limbahnya hujan tatarusan.
“Kaba’ahan ngitu nang sarajin bisa marusak mitiran banyu sababnya tarandam,” ujar sidin di Banjarmasin, nang kaya dibaritaakan habarpdam.com, Sabtu (11/12) hari ni tadi.
Gasan buhan palanggan PDAM Bandarmasih nang mitiran banyunya rusak, ujar sidin, hancapi ha malapur nyaman kaina dibaikiakan.
“Wayah ba’ah ngini nang mau maulah mitiran banyu parusak, kabiasaannya batagar bakas tarandam atawa bisa jua katuyukan bulanak nang tatinggal pas banyu basurut,” ujar sidin.
Lamunnya kajadian mitiran banyu tarandam, ujar sidin mamadahakan pulang, nang bagus tu biasanya dipindah kaandakannya atawa ditinggi’i ai lagi pada nang tadahulu.
“Sutil haja nintu sanak ai, kita sasuwayakan wan kaadaan. Pukuknya kada usah ragu atawa supan malapur, sabab pacang dibaikiyakan kada babayaran, sajampal kada dimintai duit,” ujar sidin pulang.
Mitiran banyu ngitu alat nang panting sakira tahu barapa pamakaian banyu.
Gasan bubuhan palanggan PDAM Bandarmasih, tampulu layanannya diparayakan lakasi ha malapur nang mana mitiran banyunya rusak, sabab lamunnya rusak ngalih patugas pamariksa kada kawa mambaca, pa nang rugi palanggannya saurang.
Jadi lamunnya handak mamindah kaandakan mitiran banyu nang sakira kaina kada tarandam lagi pas ba’ah, hubungi haja talipun Call Center PDAM Bandarmasih di 05113252541 atawa di WhatsApp Center 0811-5151-46. (zda/RA)
Kamus:
- Pusang = Gundah ; perasaan tidak karuan
- Ba’ah ; Kaba’ahan = Banjir ; kebanjiran
- Sarajin = biasanya
- Hancapi ; Lajui ; Capati = Cepatlah ; lekas ; segera
- Bulanak = Lumpur
- Rusak ; Parusak = Rusak ; sering rusak/cepat rusak
- Tuyuk ; Katuyukan = Tumpuk ; tertumpuk/tertimbun
- Kaandakan = Letak
- Sutil = Gampang ; mudah
- Sasuwayakan (serapan Bahasa Indonesia) = Disesuaikan ; diatur
- Jampal ; sajampal = Sepeser (istilah, menggambarkan kondisi tidak ada uangnya).
- Ngitu ; Nintu = Itu
- Paray ; Diparayakan = Gratis ; digratiskan ; tidak berbayar ; libur ; batal ; tidak jadi
- Amun ; Lamun ; Lamunnya = Bila ; kalau ; andai
