KANDANGAN (TABIRkota) – Pamarintah Kabupatin Hulu Sungai Selatan (HSS) Kalimantan Selatan (Kalsel) handak maadaakan layanan cuci darah atawa hemodialisa ujar urang Asing manyambat, di Rumah Sakit Daha Sejahtera di Kacamatan Daha Selatan.
Lamunnya kaina hudah diadaakan layanan nintu sanak ai, insya Allah pacang nyaman am buhan kula kita di Nagara, kada usah lagi bacuci darah ka Kuta Kandangan.
Dr dr H M Rudiansyah MKes SpPD-KGH matan Perhimpunan Nefrologi Indonesia (Pernefri) Kalsel hudah jua mampiripikasi (verifikasi, red) lapangan gasan mancik kasiapan RS Daha Sejahtera mambuka layanan cuci darah pas arian Arba (8/12) samalam.
Nang jadi partimbangan gasan maadaakan layanan cuci darah tu ti, masalah ada kadanya ruangan nang tasadia wan jua urang nang mananganinya, kamampuannya mambada’i atawa kada.
Napa-napa nang ditamuakan wayah piripikasi tu ti, lalu dipandirakan lawan Bupati HSS, H Achmad Fikry di kantur wadah sidin bagawi, di Kandangan.
Pas badapatan wan Bupati, lalu sidin bakisah awal mula kanapa jadi handak maadaakan layanan cuci darah di RS Daha Sejahtera.
“Dahulu wayah ulun kampanye di Batang Alai, Nagara, ulun batamuan wan pasin cuci darah nang tamasuk urang kada mampu,” ujar Bupati bamula kisah.
Urang tu ti, ujar Bupati, tapaksa bulang bulik matan Nagara ka Kandangan gasan batatamba, bacuci darah.
“Matan Nagara ka Kandangan ba bintur (bentor; becak motor, red) nang tambangnya kada mumurahan, Rp250 ribu sakali bulang bulik, saminggu dua kali, han kada Rp500 ribu lah, gasan tambang haja,” ujar sidin.
Maras wan bubuhan Nagara nang musti bulang bulik ka Kandangan gasan batatamba, lalu pamarintah HSS maadaakan bis nang babulang bulik dua kali dalaman saminggu.
“Malaran gasan maringanakan tambang bubuhan Nagara nang batatamba bacuci darah ka Kandangan,” ujar sidin pulang.
Lamunnya kaina lakunnya di RS Daha Sejahtera hudah hingkat bacuci darah, bubuhan Nagara kada tajauhi lagi babulang balik ka Kandangan. Han, kita du’aakan mudahan lancar haja urusannya. (zda/RA)
Kamus :
- Lamun ; Lamunnya = Bila ; Apabila
- Urang Asing = Sebutan untuk orang asing, bangsa Barat ; bule.
- Kula = Keluarga ; istilah untuk menggambarkan rasa kekerabatan/kedekatan secara emosi ; bentuk penghormatan dalam penyebutan kepada orang, kaum, etnis lain.
- Mambada’I = Memungkinkan ; pantas.
- Pasin = Pasien (pelafalan, bukan istilah baku).
- Bulang Bulik = Pulang Pergi ; bolak balik
- Batatamba ; Tatamba = Berobat ; obat.
- Tambang = Ongkos ; biaya.
- Dalaman (Banjar Pahuluan) = Rentang (waktu/ukuran) ; antara.
- Hingkat (Banjar Pahuluan) ; Kawa = Bisa ; mampu.
