AMUNTAI (TABIRkota) – Jalan ganal atawa jalan propinsi di Kampung Pinang Habang, Kacamatan Amuntai Tengah, Kabupaten Hulu Sungai Utara (HSU), pasnya di jumbatan watas Pinang Habang lawan Danau Caramin, tagasnya pacangan pagat, napa pang mun ditiring-tiring pina ada nang rangat wan mun diliatakan kalawasannya pacang rumbih tu.
Palaksana Tugas (Plt) Bupati HSU, H Husairi Abdi, di gani’i Ketua Komisi III DPRD Provinsi Kalsel, wan jua Satker Pelaksanaan Jalan Nasional (PJN) wilayah II Provinsi Kalsel ada pang hudah malihati kaadaan jalan ngitu hari Ahad (5/12) samalam.
“Kita gin jua ada manarima masukan wan kaluhan warga masalah karusakan jalan, wabil khusus nang di jalan ganal,” ujar Husairi.
Mun ujar Katua Kumisi III DPRD Provinsi Kalsel, H Sahrujani, bubuhan sidin handak mamastiakan nang kaya apa kaadaan nang sabujurannya, jadi nyaman kaina dibahas pas Rapat Dengar Pendapat (RPD), nangkaya apa jua pacangan jalan kaluarnya.
“Kami hari arba ngini handak maadakan RPD lawan buhan Dirlantas, Dinas Perhubungan, Balai Jalan wan nang lainnya, jadi mun hudah datang wan malihat langsung kaadaan nang sabujurannya, nyaman kaina kita mamadahakan pas rapat,” ujar sidin.
Lamunnya manurut sidin, salakasnya maka am ada tindakan, paling kada dipasangi papan pambaritahuan supaya urang nang lalu lalang kawa bagamat atawa bahati-hati, supaya kada sampai kamalangan.
Pawakilan Satker PJN wilayah II Provinsi Kalsel, Muhammad Shalafuddin manambahiakan jua, ujar sidin, mun hudah malihati langsung ni nyaman mangira-ngira saapa bangatnya karusakannya wan napa-napa nang pacang digawi.
“Mambaiki jalan ni kada iincaan, musti disiapakan bujur-bujur. Kita baharap banar pang, kawa lakas dibaiki,” ujar sidin.
Jalan ganal di HSU pinanya kada nang sahuaran tu ti haja nang bangat, di lain gin ada jua nang rusak, nang kaya di pasimpangan Paliwara wan pasimpangan Palampitan Hulu, pa rusak banar jua, makanya rancak tatuyuk kandaraan di situ. (zda/RA)
Kamus:
Watas = Batas
Tagas = Seperti ; Tagasnya = Sepertinya
Tiring = Lihat
Pacang ; Pacangan = Bakal ; Akan
Arba = Rabu (nama hari)
Kamalangan = Tertimpa musibah ; Kecelakaan
Iincaan = Main-main
Sahuaran = Satu-satunya ; sebuah
Tuyuk ; tatuyuk = Tumuk ; tertumpuk ; menumpuk
