Baubah Jadi Omicron, Covid Batambah Harat Sanak ai, Jangan Kalumpanan Batukup Muntung wan Hidung lah

TANJUNG (TABIRkota) – Covid 19 wayahini sanak ai, baubah pulang jadi Omicron nang labih harat wan kawa manjangkiti labih capat, makanya kita ni diwanti-wanti banar supaya jangan kalumpanan mamakai tukup muha wan tukup hidung atawa nang disambat urang wayahini masker ngarannya.

Musim bapanyakitan wayah ka damiya, Kapala Dinas Kasihatan Kabupatin Tabalong, Taufiqurrahman Hamdie bapapadah, ujar sidin, mustinya kita jangan babal, masker tu pakai haja tarus.

“Samantangan wayahini urang takana covid 19 pina ranai pada dahulu, lalu ai banyak nang kada hakun lagi mamakai masker, padahal liwar luput anggapan nang kaya nintu,” ujar sidin.

Maka ujar sidin, Omicron nang hanyar nih, kada kaya covid sarajin, inya pa kada pina batuk atawa bahinak pina manggah.

“Omicron ngintu sanak ai, mun urang takana, nang kaya virus biasa haja, palingan kapala pina ngalu atawa awak kah singkalan wan asa lamahan urat,” ujar sidin pulang.

Omicron ni panambayan katahuan di Afrika. Pas ditamuakan, sakalinya undasnya virus covid nang bangaran “protein spike” nang maulah inya kawa barikit ka manusia, banyak baubah.

Lamunnya covid nang mudil Delta, “protein spike” nang gasan baubah-ubah tu hitungannya ada walu, tapi lamunnya mudil Omicron nang hanyar ni, “protein spike”nya 32, ampat kali lipat labih banyak.

Jadi ujar Taufiqurrahman manambahi pulang, Omicron ngini kada sahibar labih harat wan labih capat manularakan virus, vaksin wan tatamba covid 19 gin kawa inya mahindari. Han, liwar harat kalu lih.

“Lamunnya pamarintah kawa kada mambariakan bubuhan urang asing nang tagasnya pina katularan Omicron supaya kada masuk ka Banua kita, kikira kawa kita maantisipasi supaya kada manjangkit kamana-mana,” ujar sidin pulang.

Jadi lamunnya wayahini pamarintah kita mangurung atawa mangarantina ujar urang wayahini sambatannya, wan bubuhan urang Afrika atawa urang matan Banua lain nang tagasnya ada tajangkit Omicron, itu pas banar hudah. (zda/RA)

Kamus :

Kalumpanan (Banjar Pahuluan) ; kada ingat ; kada ingatan = lupa

Tukup = tutup ; Batukup = ditutup

Ka damiya (Banjar Alai) ; wayahini ; damini = saat sekarang

Babal = sering lupa

Samantangan = mentang-mentang

Sarajin (Banjar Pahuluan) ; nang rajin = biasanya

Panambayan = pertama kali; yang pertama

Undas = yang utama ; pemain utama

Silahkan Bagikan / Share :

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

"Borneopedia", Mobile App that Enriches Knowledge about Kalimantan

Ming Des 5 , 2021
BADUNG (TABIRkota) – PT Borneopedia Digital Indonesia has recently introduced an informative, educational mobile app named “Borneopedia”. The app, which comes up with a tagline of “Everything about Borneo”, is designed to provide information and knowledge to the general public about Kalimantan Island. The launch of Borneopedia took place on […]

You May Like