MUARA TEWEH (TABIRkota) – 17 kampung wan babarapa kalurahan di lima kacamatan di Kabupaten Barito Utara (Barut), Kalimantan Tengah (Kalteng) kaba’ahan pulang imbah babarapa hari hujan labat wan patir-patirnya turun kada sing ampihan.
Kasi Kedaruratan Badan Penanggulangan Bencana Daerah (BPBD) Barut, Hasnan mamadahakan, dalamnya banyu masing-masing, antara 30cm sampai nang paling dalam 1,2 meter.
“Kita ada jua pang sudah manarima pasan matan Badan Meteorologi Klimatologi dan Geofisika (BMKG) nang mamadahakan hujan pacanagan turun kada baampihan babarapa hari ni,” ujar sidin di Muara Teweh, ibu kota Barut, Rabu (3/11).
Lima kacamatan nang kaba’ahan tu Lahei Barat, Lahei, Teweh Baru, Teweh Selatan wan Teweh Tengah nang tamasuk kuta.
Banyu lakas banar naik wan marandam parumahan nang kaya di Jalan Merak, Dahlia, Cempaka Putih wan Panglima Batur di Muara Teweh.
Banyu jua marandam Kalurahan Jingah wan Jambu, disitu ti ratusan rumah urang calap jua antara 30cm sampai 40cm dalamnya banyu.
Ujar urang situ mamadahakan, mulai awal tahun samalam sampai wayahini, sudah tiga kali bubuhannya kaba’ahan. (RA)
