KANDANGAN (TABIRkota) – Arai banar tu pang bubuhan tani di Hanau, Desa Panjampang Bahagia, Kecamatan Simpur, Kabupaten Hulu Sungai Selatan (HSS), wayahini hingkat batanam satahunan wan kada ngalih lagi maangkut hasil kabun sababnya sudah diulahakan pamarintah irigasi air tanah atawa sumur bor wan Jalan Usaha Tani (JUT).
Bupati HSS, Achmad Fikry mamadahakan, sumur bor nangitu mambantu banar wan bubuhan tani supaya bubuhannya kada lagi tagantung wan banyu, khususan pas wayah kamarau.
“Dahulu bubuhan tani kawa batanam pas musim panghujan haja, mun musim kamarau tapaksa ai baranai. Tapi wayahini kada lagi, banyu sudah tasadia sapanjang tahun,” ujar sidin di Kandangan, ibu kota HSS, Jum’at (29/10).
Bubuhan tani di Hanau wayahini jua, ujar sidin pulang, kada ngalih lagi maangkut hasil kabun, lancar sudah imbah diadaakan pamarintah JUT.
“Dahulu maka am, bubuhan tani tapaksa mahambin hasil kabun. Wayahini, nyaman banar dah, kawa diangkut ba kandaraan,” sidin mamadahakan.
Jadi ujar sidin, pamarintah maulahakan napa-napa gasan kanyamanan bubuhan tani, gasan malancarakan usaha.
“Jadi bubuhan tani kita ni parlu jua mamikirakan wan mamilih tanaman nangapa nang handak di tanam supaya kada tatuyuk sabuting tanaman haja pas panen nang bisa maulah haraga rusak,” sidin bapapadah.
Sumur bor wan JUT tu tih hudah jua dirasmiakan Bupati pas harian Kamis (28/10) samalam nang ditandai wan panatakan pita wan pananda tanganan prasasti.
Sumur bor wan JUT tu tih diadaakan pamarintah mamakai Dana Alokasi Khusus (DAK) wan Anggaran Pendapatan dan Belanja Daerah (APBD) HSS tahun anggaran 2021. (RA)
Sumber: Prokopim Setda HSS
Kamus :
Hingkat (Banjar Pahuluan) ; Kawa = Bisa ; sanggup ; mampu
Aria = Sangat senang ; (perilaku) membanggakan sesuatu.
Tuyuk ; Tatuyuk = Tumpuk ; Tertumpuk/bertumpuk.
